បាល់ទាត់៖ កីឡាករវ័យ ៣០ឆ្នាំ James Rodriguez ត្រូវបានគេសង្កេតឃើញមានកោះហៅចូលរួមជាមួយក្រុមជម្រើសជាតិកូឡុំប៊ីឡើងវិញជាលើកដំបូង បន្ទាប់ពីបាត់មុខរយៈពេលជិត១ឆ្នាំ ខណៈក្រុមកូឡុំប៊ី ត្រូវត្រៀមខ្លួនជួបជាមួយក្រុមខ្លាំងប្រេស៊ីល និងប៉ារ៉ាហ្គាយ នាវគ្គជម្រុះ FIFA World Cup ទ្វីបអាមេរិកខាងត្បូងដែលនឹងចាប់ផ្តើមនាពាក់កណ្តាល ខែវិច្ឆិកានេះ។

កីឡាករនាំលេង និងជាអតីតកីឡាកររបស់ Real Madrid និង Everton និងធ្លាប់ជាម្ចាស់ស្បែកជើងមាសក្នុងព្រឹត្តិការណ៍ FIFA World Cup ២០១៤​ ខាងលើនេះ ត្រូវបានបញ្ចូលក្នុងបញ្ជីកីឡាករទាំង ២៨នាក់​របស់អ្នកចាត់ការវ័យ ៦៤ឆ្នាំ លោក Reinaldo Rueda ឡើងវិញ បន្ទាប់ពីបាត់មុខពីការប្រកួតរបស់កូឡុំប៊ី ១៥ប្រកួតតាំងពីខែវិច្ឆិកា ឆ្នាំ២០២០ គ្រាដែលកូឡុំប៊ីបរាជ័យធ្ងន់ករក្នុងជំនួបទល់នឹងអេក្វាដ័រ ៦-១។ បច្ចុប្បន្ននេះ James Rodriguez កំពុងលេងឱ្យក្លិបបាល់ទាត់ Al-Rayyan SC នៃលីគកំពូលកាតា ក្រោយចាកចេញពី Everton បន្ទាប់ពីការចូលកាន់តំណែងរបស់លោក Rafael Benitez។ 

គួរបញ្ជាក់ថា កូឡុំប៊ី នឹងត្រូវជួបជាមួយម្ចាស់ផ្ទះប្រេស៊ីល នាកីឡដ្ឋានទីក្រុង Sao Paulo នាថ្ងៃទី១១ ខែវិច្ឆិកានេះ មុននឹងទទួលស្វាគមន៍ក្រុមប៉ារ៉ាហ្គាយ នាថ្ងៃទី១៦ ខែវិច្ឆិកា ក្នុងទឹកដីរបស់ខ្លួន។ បច្ចុប្បន្ននេះ កូឡុំប៊ីកំពុងឈរនៅចំណាត់ថ្នាក់លេខ៤ ក្នុងតារាងវគ្គជម្រុះ FIFA World Cup ទ្វីបអាមេរិកខាងត្បូងមាន ១៦ពិន្ទុ ស្មើជាមួយក្រុមលេខ៥ អ៊ុយរូហ្គាយ តាមពីក្រោយក្រុមអេក្វាឌ័័រ ១ពិន្ទុ ដាច់ពីក្រុមកំពូលតារាងប្រេស៊ីល ១៥ពិន្ទុ។

គួររំឮកថា James បានបង្ហាញខ្លួនក្នុងក្រុមធំជម្រើសជាតិកូឡុំប៊ីជាលើកដំបូងបង្អស់នៅឆ្នាំ២០១១ និងលេងបានសរុប ៨០ប្រកួត ស៊ុតបញ្ចូលទី២៣គ្រាប់៕